Agger vill nýjan samning

Daniel Agger, leikmaður Liverpool, segist gjarnan vilja ganga frá samningsmálum sínum sem allra fyrst en hann á átján mánuði eftir af núverandi samningi sínum.

Agger á nú í samningaviðræðum við félagið en hann hefur einnig verið orðaður við önnur félög, til að mynda við AC Milan.

Agger segist þó vilja vera áfram í herbúðum Liverpool en hann skilur þó ekki af hverju viðræðurnar ganga svo hægt.

„Ég lét félagið um að tala og sjálfur læt ég verkin tala inn á vellinum. Ég hef reynt að bæta mig og mér finnst að mér gangi betur með hverjum leiknum," sagði Agger sem var lengi frá vegna meiðsla en hefur fengið að spila meira í fjarveru Martin Skrtel.

„Ég vil vera áfram ef það er mögulegt. Boltinn er nú hjá félaginu og við verðum að sjá hvað gerist."