Ronaldo segist sá besti

Cristiano Ronaldo segist vongóður um að verða valinn bæði knattspyrnumaður Evrópu og leikmaður ársins hjá Alþjóða knattspyrnusambandinu, FIFA.

Hann sagði í samtali við brasilískt dagblað að hann teldi að hann hafi gert nóg til að hljóta bæði verðlaun. Manchester United varð á síðustu leiktíð bæði enskur meistari sem og Evrópumeistari og var Ronaldo í lykilhlutverki.

„Ég er sá besti, næst besti og þriðji besti leikmaður heims," gantaðist hann en viðurkenndi að það væru fleiri sem kæmu til greina, svo sem Kaka, Lionel Messi og Fernando Torres.

„Mitt markmið er að vinna allt það sem ég mögulega get," sagði hann.