Capello vill hitta Gerrard

Fabio Capello bað í gær Steven Gerrard, leikmann Liverpool, að koma til móts við sig og enska landsliðshópinn þó svo að hann væri meiddur.

Gerrard meiddist í leik Liverpool gegn Bolton um helgina og er talið að hann verði frá næstu tíu dagana. Engu að síður vill Capello að læknar landsliðsins líti á hann og skoði meiðslin nánar og verður það gert í dag.

Enskir fjölmiðlar hafa gert mikið úr málinu í dag og segja sumir að Capello sé allt annað en sáttur við stöðu mála. 

Wayne Rooney og Rio Ferdinand missa af leiknum vegna meiðsla og þá er John Terry fyrirliði tæpur. Þá var Paul Robinson kallaður í landsliðið eftir að Joe Hart meiddist á ökkla um helgina. Hann verður frá í allt að fjórar vikur.