Myndi fórna golfinu fyrir Evrópubikarinn

Tékkinn Pavel Nedved hjá Juventus hefur átt sigursælan feril sem knattspyrnumaður. Hann hefur þó enn ekki náð að sigra í Meistaradeild Evrópu og segist vera tilbúinn að fórna ýmsu til að hljóta þann heiður.

"Ég væri tilbúinn að fórna öllu því góða í lífi mínu nema konu minni og börnum fyrir að fá að vinna Meistaradeildina. Ég myndi meira að segja vera tilbúinn til að hætta að spila golf með Alessandro Del Piero og Mauro Camoranesi ef ég fengi að vinna Evrópubikarinn," sagði þessi 36 ára gamli Tékki.