Van der Sar áfram í herbúðum United

Edwin van der Sar mun vera nálægt því að semja við Manchester United um að spila með liðinu í eitt ár til viðbótar.

Umboðsmaður van der Sar, Rob Jansen, greindi frá því í kvöld að hann hefði átt í viðræðum við United á undanförnum tveimur vikum. Hann sagði að aðilar hefðu náð samkomulagi um nýjan eins árs samning.

Van der Sar er 38 ára gamall en hefur áður sagt að honum liggi ekkert á að hætta í knattspyrnunni. Hann er þó hættur að spila með hollenska landsliðinu.

„United mun kynna þetta með formlegum hætti á föstudaginn," sagði Jansen í samtali við enska fjölmiðla. „En hvað gerist þegar svo nýi samningurinn rennur út veit ég ekki."

Van der Sar gekk í raðir United frá Fulham árið 2005 en hann hefur einnig leikið með Juventus og Ajax á sínum ferli.