Walcott frá í þrjá mánuði

Theo Walcott, leikmaður Arsenal, gekkst í dag undir aðgerð á öxl en hann fór úr axlarlið á æfingu með enska landsliðinu í vikunni.

Arsene Wenger, knattspyrnustjóri Arsenal, staðfesti þetta í dag og sagði að hann yrði frá í þrjá mánuði vegna þessa.

„Hann getur spilað aftur eftir þrjá mánuði en tekur lengri tíma en það að komast aftur í sitt besta form. Leikmaður þarf tíma til að læra að nota öxlina rétt eftir slík meiðsli."

Vandræði Walcott með öxlina teljast vera arfgeng en hann hefur áður gengist undir aðgerð vegna axlarmeiðsla. Hann meiddist þá í leik með Arsenal gegn Stoke árið 2007.

Walcott hefur verið fastamaður í byrjunarliði Arsenal á leiktíðinni en hann er nítján ára gamall.