Íslenskur fjárfestir setur klæðskera Bretadrottningar í vanda

Fyrirtækið Hardy Amies, sem er fyrrum opinber klæðskeri Elísabetar Bretadrottningar, er í miklum vanda eftir að fjárfestingarfélagið Arev neitaði Hardy um frekari lánafyrirgreiðslu. Arev er í eigu Jóns Scheving Thorsteinssonar fyrrum forstjóra Baugs í Bretlandi.

Samkvæmt frásögn í blaðinu Guardian rambar Hardy Amies nú á barmi gjaldþrots og hefur farið fram á það við kauphöllina í London að viðskipti með hluti í fyrirtækinu verði stöðvuð meðan það greiðir úr fjármálum sínum.

Arev er einn af stærstu hluthöfunum í Hardy Amies en fyrirtækið var stofnað af Sir Hardy Amies í lok seinni heimstryjaldarinnar. Árið 1955 varð Hardy svo opinber klæðskeri Bretadrottningar og hélt þeim titili til 1990.

Fram kemur í frétt Guardian að Arev hafi lánað Hardy Amies umtalsverðar fjárhæðir á síðustu árum. Frekari beiðnum um lán nýlega var svo hafnað.