Markalaust hjá Aston Villa og Man Utd

Aston Villa og Manchester United gerðu markalaust jafntefli í lokaleik dagsins í ensku úrvalsdeildin. Sem þýðir að öll þrjú efstu lið deildarinnar gerðu markalaus jafntefli í sínum leikjum.

Martin O'Neill gerði eina breytingu á byrjunarliði Aston Villa er Nigel Reo Coker kom inn fyrir Carlos Cuellar, sem á við meiðsli að stríða.

Wayne Rooney og Rio Ferdinand voru báðir í byrjunarliði United í dag en þeir hafa báðir átt við meiðsli að stríða að undanförnu. Dimitar Berbatov þurfti að víkja fyrir Rooney sem lék með Carlos Tevez í fremstu víglínu. Þá kom Ryan Giggs inn fyrir Darren Fletcher.

Leikurinn byrjaði nokkuð rólega en fljótlega tóku leikmenn United völdin í hendurnar, án þess þó að skapa sér afgerandi dauðafæri. United gekk þó mun betur að sækja.

Heimamenn létu meira til sín taka í upphafi síðari hálfleiks en sem fyrr gekk lítið sem ekkert fyrir framan markið.

Wayne Rooney fékk þó besta færi leiksins í síðari hálfleik er hann lét vaða að marki af fremur stuttu - en þröngu - færi eftir sendingu Michael Carrick en boltinn fór yfir markið.

Aston Villa tókst þó að skapa sér hættulega sókn undir lok leiksins er James Milner komst upp að endalínuni og kom boltanum fyrir markið. Varnarmenn United náðu hins vegar að bjarga á síðustu stundu.

Þar við sat og er United enn í þriðja sæti deildarinnar, átta stigum á eftir toppliðum Chelsea og Liverpool en á þó leik til góða. Aston Villa dugði stigið til að koma sér upp fyrir Arsenal í fjórða sæti deildarinnar.