Fiskvinnslan GPG Norge stefnir í gjaldþrot

Allar horfur eru á að fiskvinnslufyrirtækið GPG Norge verði lýst gjaldþrota á næstunni eða þá að fyrirtækið verði þvingað í þrot að því er fram kemur í blaðinu Fiskeren. Í raun er fyrirtækið sagt gjaldþrota vegna óuppgerðra launa og orlofs starfsmanna.

Vefsíðan Interseafood greinir frá þessu og þar segir að GPG Norge sé í eigu íslenskra aðila. Fyrirtækið hefur verið með starfsemi í Karlsöy í Norður-Noregi þar sem 80 starfsmenn hafa unnið og einnig í Karmöyvær á Nordkapp þar sem 20 manns vinna.

Engin vinnsla hefur verið á þessum stöðum frá 5. maí sl. þrátt fyrir að nú er sá árstími að nótaveiði á ufsa stendur hvað hæst og vinnsla ætti með öllu eðlilegu að vera í fiskvinnslum félagsins frá morgni til kvölds.

Í frétt Fiskaren segir að stjórnendur Sparebanken Nord-Norge hafi misst þolinmæðina gagnvart eigendum GPG Norge og sett þeim úrslitakosti. Þeir vilja að farið verði að hlutafélagalögum en fyrst og fremst að hagsmunir bankans verði tryggðir sem best.

Hvað starfsfólkið varðar þá segja trúnaðarmenn að þeir vilji að nýir eigendur taki við rekstrinum. Þeir upplýsa að framkvæmdastjóri GPG Norge hafi leynt þá upplýsingum og með því brotið gegn lögum. Fram kemur að það skipti starfsfólkið, sem nú er komið á atvinnuleysisbætur, miklu máli hvernig staðið verður að málum.

Ef eigendur fyrirtækisins lýsi yfir gjaldþroti eða ef bankinn keyrir félagið í þrot þá fari launa- og orlofskröfur í forgang við uppgjör á þrotabúinu. Aðrar leiðir gætu falið í sér að kröfur starfsmanna færu aftarlega á listann yfir forgangskröfur.