NBA í nótt: Tólfta tap Oklahoma

Oklahoma City Thunder tapaði í nótt sínum tólfta leik af þrettán á tímabilinu eftir að félagið rak þjálfara liðsins fyrr um daginn.

Þetta er versta byrjun í sögu félagsins sem hét áður Seattle Supersonics. PJ Carlesimo var látinn taka poka sinn í gær eftir að liðið tapaði fyrir New Orleans Hornets á heimavelli en þessi lið mættust svo aftur í New Orleans í nótt.

New Orleans vann leikinn með tólf stiga mun, 109-97. Scott Brooks, fyrrum aðstoðarmaður Carlesimo, stýrði liðinu og mun gera það út leiktíðina.

Chris Paul átti stórleik í liði New Orleans og náði þrefaldri tvennu - 29 stigum, tíu fráköstum og sextán stoðsendingum. David West var stigahæstur í liðinu með 33 stig.

Kevin Durant skoraði 30 stig fyrir Oklahoma, Jeff Green sautján og Chris Wilcox fjórtán.

Houston vann Orlando, 100-95, þar sem Yao Ming skoraði 23 stig og tók þrettán fráköst fyrir Houston sem vann sinn fimmta leik í röð.

Milwaukee vann Charlotte, 79-74. Ramon Sessions skoraði átján stig fyrir Milwaukee, þar af tvö vítaköst á lokasekúndum leiksins sem tryggðu liðinu endanlega sigurinn í leiknum.

New York vann Washington, 122-117. Quentin Richardson var með 34 stig og tólf fráköst fyrir New York.

Miami vann Indiana, 109-100. Dwyane Wade skoraði 38 stig fyrir Miami sem var á tímabili fimmtán stigum undir í leiknum.

Cleveland vann Atlanta, 110-96, sem um leið vann sinn níunda sigur í síðustu tíu leikjum sínum.



New Jersey vann LA Clippers, 112-95. Yi Jianlian skoraði 27 stig fyrir New Jersey.

Utah vann Memphis, 103-94. Mehmet Okur skoraði 23 stig fyrir Utah og OJ Mayo jafn mörg stig fyrir Memphis.

Phoenix vann Portland, 102-92, þar sem Shaquille O'Neal var með nítján stig og sautján fráköst fyrir Phoenix en Brandon Roy 26 stig fyrir Portland.