Curbishley spenntur fyrir Sunderland

Alan Curbishley hefur greint frá áhuga sínum að taka við starfi knattspyrnustjóra hjá enska úrvalsdeildarfélaginu Sunderland.

Roy Keane hætti sem stjóri Sunderland í vikunni eftir 27 mánuði í starfi. Sunderland er sem stendur í átjánda sæti deildarinnar.

Curbishley hætti í september síðastliðnum hjá Íslendingafélaginu West Ham. Curbishley tók við liðinu á miðju tímabilinu 2006-7 og bjargaði þá liðinu frá falli á ævintýralegan máta og hann vill gera það sama fyrir Sunderland nú.

„Ég hef starfað í úrvalsdeildinni undanfarin tíu ár og vil gera það áfram," sagði Curbishley í samtali við enska fjölmiðla. „Fólk heldur að liðin sem ég stýri eru leiðinleg og ná aldrei ofar í töflunni en tíunda sæti."

„En það er ljóst að það eru nokkur lið í deildinni nú sem gæfu mikið fyrir að vera í þeirri stöðu."

Curbishley hefur verið orðaður við starfið ásamt þeim Sam Allardyce, Gordon Strachan og Phil Brown.