Inspired Gaming í söluferli

Inspired Gaming, afþreyingarfyrirtæki að hluta í eigu FL Group sem rekur ýmiss konar veðmálastarfsemi, er komið í söluferli í kjölfar þreifinga af hálfu nokkurra áhugasamra kaupenda. Global Leisure Partners er fyrirtækjasöluaðili sem fenginn hefur verið til að stýra sölunni og meta tilboð sem berast.

Við lokun markaða á föstudag stóð hluturinn í Inspired Gaming í 67 pensum, tæpum 96 krónum, en markaðsvirði fyrirtækisins er 48,8 milljónir punda, tæpir sjö milljarðar króna. Einhverjir spámenn eru þeirrar skoðunar að stjórn Inspired Gaming láti það ekki á minna en 160 pens hlutinn en aðrir veðja á hærri kröfur.

FL Group á stóran hlut í Inspired Gaming og var komið á fremsta hlunn með að gera yfirtökutilboð í nóvember. Þá heyrðist talað um 385 pens á hlut, rúmlega 550 krónur, en þær viðræður runnu út í sandinn vegna óhagstæðra markaðsaðstæðna, að sögn FL Group. en skv. ársskýrslu þess var kostnaðurinn við áætlaða yfirtöku rétt tæpur milljarður.

Rekstur Inspired Gaming virðist hafa staðið í járnum síðustu misseri og hyggst fyrirtækið skera starfsemi sína niður, m.a. með því að selja þann hluta þess sem annast rekstur spilakassa í vínveitingahúsum. Hefur sókn í slík tæki dregist verulega saman í kjölfar reykingabanns á stöðunum.

Times greindi frá þessu.