Benitez: Kláruðum verkefnið

Rafa Benitez, knattspyrnustjóri Liverpool, var ánægðari með úrslitin í kvöld en spilamennsku sinna manna.

Liverpool tryggði sér í kvöld sæti í 16-liða úrslitum Meistaradeildar Evrópu með 1-0 sigri á Marseille. Steven Gerrard skoraði sigurmark leiksins í fyrri hálfleik.

Það kemur í ljós í næstu viku hvort liðið nær efsta sæti riðilsins en þau eru jöfn á stigum. Benitez var fyrst og fremst ánægður með úrslitin.

„Maður verður að líta á jákvæðu hliðarnar - okkar spilamennska var ekki upp á sitt besta en við náðum þó að skora. Við fengum nokkur tækifæri að skora úr skyndisóknum en við erum komnir áfram og það er aðalmálið."

„Við vorum greinilega nokkuð taugaóstyrkir en við vissum að við þyrftum bara að vinna leikinn til að komast áfram. Nú þurfum við að einbeita okkur að úrvalsdeildinni."