Hutton frá í allt að fimm mánuði

Tottenham hefur orðið fyrir miklum skakkaföllum er í ljós kom að Alan Hutton þarf að gangast undir aðgerð og verður að þeim sökum frá í allt að fimm mánuði.

Um er að ræða meiðsli á fæti en Hutton meiddist í upphafi tímabilsins. Hann byrjaði að spila aftur í síðasta mánuði og lék til að mynda allan leikinn er Skotland mætti Argentínu í vináttulandsleik.

„Þetta er alvarlegt. Hann verður frá í einhverja mánuði," sagði Harry Redknapp, stjóri Tottenham. „Þetta eru sömu meiðslin og hann varð fyrir í upphafi ársins. Þá var ákveðið að hann færi ekki í uppskurð en nú hafa meiðslin tekið sig upp."

Hutton er 23 ára varnarmaður sem gekk til liðs við Tottenham í janúar síðastliðnum frá Rangers í Skotlandi.