Carnegie í mál við sænsk stjórnvöld, deilt um forsvarið

Hlutafjáreigendur í móðurfélagi Carnegie bankans í Svíþjóð ætla í mál við Lánastofnun sænska ríkisins (Riksgälden) og forstjóra hennar Bo Lundgren vegna yfirtöku sænska ríkisins á Carnegie fyrr í vetur.

Á sama tíma rekur Carnegie bankinn mál gegn sænska fjármálaeftirlitinu af sömu sökum. Þar er hinsvegar komin upp nokkuð skrýtin staða því gamla og nýja stjórn bankans deila nú um hvor þeirra eigi að vera í forsvari fyrir Carnegie í því máli. Sem kunnugt er af fréttum átti Milestone hlut í bankanum þegar hann var þjóðnýttur.

Fram kemur á Dagens Industri að það er fyrrum forstjórinn Anders Fällman sem stjórnar lögsókninni gegn Riksgälden en hann er vopnaður lögfræðiáliti lagaprófessorsins Jan Kleinman. Samkvæmt áliti Kleinman stenst yfirtaka Riksgälden á Carnegie og tryggingarfélaginu Max Matthiesen ekki lög og brýtur gegn eignarrétti sænsku stjórnarskrárinnar.

Anders Fällman stjórnar einnig málssókninni gegn fjármálaeftirlitinu en þar er þess krafist að afturköllun eftirlitisins á bankaleyfi Carnegie sé dæmd ógild. Núverandi forstjóri Peter Norman sem skipaður var af sænskum stjórnvöldum vill að málið sé í hans forsjá og sér ekki fyrir endan á þeirri deilu