Grétar búinn að skora eitt og leggja upp annað

Grétar Rafn Steinsson hefur farið mikinn í leik Middlesbrough og Bolton í ensku úrvalsdeildinni. Hann skoraði fyrra mark liðsins og lagði svo það síðara upp en staðan í hálfleik er 2-0.

Grétar skallaði aukaspyrnu Matt Taylor í netið en boltinn hafði að vísu viðkomu í Kevin Davies. Markið var þó skráð á Grétar.

Þetta mark kom á áttundu mínútu en aðeins mínútu síðar launaði hann greiðann með því að koma boltanum á Matt Taylor, sem lék á einn varnarmann Boro og þrumaði knettinum í netið.

Heiðar Helguson fór í vikunni frá Bolton til QPR en hann er ekki í leikmannahópi síðarnefnda liðsins í ensku B-deildinni í dag.

Hermann Hreiðarsson er hins vegar á bekknum hjá Portsmouth sem hefur 1-0 forystu gegn Hull eftir mark Peter Crouch. Hermann hefur ekki fengið að spreyta sig í deildinni með Portsmouth síðan 5. október er hann kom inn á sem varamaður á lokamínútu leiks Portsmouth og Stoke.

Jóhannes Karl Guðjónsson er í byrjunarliði Burnley sem tekur á móti Doncaster en staðan er markalaus í hálfleik. Ívar Ingimarsson er sömuleiðis í byrjunarliði Reading sem mætir Southampton en síðarnefnda liðið hefur forystuna í hálfleik, 1-0. Brynjar Björn Gunnarsson er á varamannabekk Reading.

Aron Einar Gunnarsson tekur út leikbann í dag og er því ekki með Coventry sem mætir Sheffield Wednesday á útivelli í dag.