Robinho fer til Chelsea í vikunni

Enska dagblaðið Daily Mail heldur því fram í dag að Chelsea muni ganga frá kaupum á Brasilíumanninum Robinho í þessari viku fyrir 31 milljón punda.

Samkvæmt frétt blaðsins komust Chelsea og Real Madrid að samkomulagi um kaupverð í gærkvöldi og að Robinho muni næst fljúga til Lundúna til að skrifa undir fimm ára samning við Chelsea. Hann mun fá 120 þúsund pund í vikulaun.

Haft er eftir Wagner Ribeiro, umboðsmanni Robinho, að verið sé að ganga frá samningum. „Tíma Robinho á Spáni er að ljúka og hann hlakkar til að takast á við ný verkefni."

Robinho sat á bekknum er Real Madrid vann 4-2 sigur á Valencia um helgina og mátti þola óblíðar móttökur hjá stuðningsmönnum Real.