Norsk ferðaskrifstofukeðja stoppar sölu á Sterling-miðum

Norska ferðaskrifstofukeðjan Berg-Hansen hefur stöðvað sölu á flugmiðum með Sterling-flugfélaginu og ráðleggur viðskiptavinum sínum að leita annað með farmiðakaup.

Fjallað er um málið á vefsíðunni Takeoff.dk. Þar segir að Berg-Hansen hafi einnig stöðvað sölu með farmiða frá Olympic Airlines í Griklandi og í vor stoppaði ferðaskrifstofan sölu á miðum Alitalia.

Um Sterling segir á heimasíðu Berg-Hansen: "Við munum bjóða viðskiptavinum okkar að panta hjá Sterling gegnum netið en ráðleggjum þeim að leita annarra möguleika ef það er hægt."

Michael T. Hansen markaðsstjóri Sterling segir að staða félagsins sé sterk og það sé engin áhætta fólgin í því að versla farmiða hjá flugfélaginu. Hann bætir því við að miðakaup með krítarkorti tryggi viðskiptavini ef um gjaldþrot verður að ræða.

Berg-Hansen í Noregi er með 30 ferðaskrifstofur, starfsfólkið er tæplega 500 talsins og veltan á ári í kringum 30 milljarða norksra kr.