Rætt um afnám bensínskatts

Meðal þess sem borið hefur á góma í málflutningi bandarísku forsetaframbjóðendanna John McCain, Hillary Clinton og Barack Obama er hvort til greina komi að afnema 18,4 senta eldsneytisskatt sem gengur til ríkisins af hverju bensíngalloni. Um er að ræða 13,3 krónur en gallon er 3,78 lítrar sem gerir 3,51 krónu á hvern lítra. Til samanburðar má geta þess að á Íslandi er vörugjald af bensíni 9,28 krónur sem verða 11,55 krónur með virðisaukaskatti.

Ýmsir aðilar í Bandaríkjunum eru nú farnir að taka til sinna eigin ráða til að lækka bensínverðið. Larry West, sem rekur flutningafyrirtæki, komst upp með það í tvö ár að dreifa bensíni til fjölmargra smásöluaðila í Texas undir því yfirskini að um væri að ræða hreinsað bensín en ekki hefðbundið eldsneyti.

Tilkynningum um bensínskattsvik fer nú fjölgandi með auknum akstri þegar sumarið fer í hönd og fólk fer að ferðast. Áætlað hefur verið að slík svik kosti ríkissjóði Bandaríkjanna um 10 milljarða bandaríkjadala ár hvert, rúma 730 milljarða króna.

„Fyrir hvern Larry West sem er handtekinn komast tíu undan," sagði William Warden hjá umhverfisglæpadeild Harris-sýslu í Texas en hann vann að rannsókninni á máli West sem hlaut fimm 20 ára fangelsisdóma. Honum er þó heimilt að afplána dómana samtímis þannig að heildarafplánun er 20 ár.

Mest kveður að bensínskattsvikum í Texas, Lousiana, Mississippi og fleiri ríkjum sem liggja að Mexíkóflóa vegna þess hve auðvelt er að smygla bensíni með skipum eftir ám og fljótum sem renna í flóann. Nokkuð hefur einnig kveðið að því að bensíni sé stolið úr birgðastöðvum og það selt og í Miami komst upp um samstarf 19 flugvirkja sem stungu 3 milljónum gallona af flugvélabensíni undan og seldu bifreiðaeigendum en flugvélabensín ber lægri skatt.

Bloomberg greindi frá þessu.