Duff vill að Kinnear verði fastráðinn

Damien Duff, leikmaður Newcastle, vill að Joe Kinnear verði fastráðinn knattspyrnustjóri liðsins en undir stjórn hans hefur það unnið tvo af síðustu sjö leikjum sínum.

Kinnear hefur aðeins verið ráðinn til eins mánuðs í senn en núverandi samningur rennur út í lok mánaðarins. Í morgun var greint frá því að Rob Lee, fyrrum leikmaður Newcastle, hélt því fram að Alan Shearer væri reiðubúinn að taka að sér starf knattspyrnustjóra.

Duff vill hins vegar að Kinnear verði fastráðinn. „Ég tel að undir hans stjórn hefur liðið fundið þann stöðugleika sem hefur vantað. Hann hefur rétt skútuna við," sagði Duff.

„Liðið hefur náð góðum úrslitum undir hans stjórn og hann hefur staðið sig vel. En framtíðin er auðvitað í mikillli óvissu á meðan að eigandinn er enn að reyna að selja félagið en vonandi leysist það sem allra fyrst."

„Leikmönnum líkar vel við Kinnear og hans starfsaðferðir. Ég myndi gjarnan vilja að hann yrði ráðinn áfram en við verðum að sjá til hvað gerist á næstu vikum og mánuðum."