Larsson orðaður við Everton

Fjölmiðlar á Bretlandi hafa orðað Svíann Henrik Larson við enska úrvalsdeildarfélagið Everton. Larsson verður samningslaus í næsta mánuði.

Larsson er 37 ára gamall og hefur undanfarin ár leikið með Helsingborg í heimalandi sínu. Hann var þó lánaður til Manchester United á þarsíðasta keppnistímabili og útilokar ekki að snúa aftur í ensku úrvalsdeildina.

„Ég er samningslaus og hef ekki ákveðið hvað ég geri næst," sagði Larsson í samtali við Daily Star í Bretlandi. „Mér líkar vel við Helsingborg en það þarf að breyta hugarfarinu hér og hvernig félagið er rekið ef ég á að semja aftur við félagið."

„Ég hef ekki enn lokað á þann möguleika að fara erlendis aftur. Við sjáum til hvað gerist," sagði Larsson.

Everton á í miklum vandræðum með framherja þar sem þeir Yakubu, James Vaughan og Louis Saha eiga allir við meiðsli að stríða.