Ronaldo sleppur við bann

Enska knattspyrnusambandið hefur staðfest að Cristiano Ronaldo verði ekki refsað fyrir atvik er kom upp í leik Manchester United og Tottenham um helgina.

Ronaldo og Michael Dawson, leikmaður Tottenham, féllu báðir við í baráttu um boltann við endalínuna. Sjónvarpsupptökur sýna svo ekki verði um villst að Ronaldo danglaði löppinni í Dawson þegar hann var að standa upp.

Talsmaður sambandsins sagði að Mike Dean, dómari, hafi ekki séð atvikið. „Eftir að hann sá atvikið á myndbandsupptökum sagði hann að hann hefði ekki rekið leikmanninn út af hefði hann séð það í leiknum,“ sagði talsmaðurinn.

Aganefnd Knattspyrnusambands Evrópu hefur annað atvik til skoðunar vegna tæklingar Wayne Rooney í leik United gegn Álaborg í Meistaradeildinni.

Þá hafa þeir Alex Ferguson, stjóri United, og Patrice Evra báðir verið dæmdir í leikbönn vegna agabrota.