British Airways og American Airlines sameina krafta sína

Flugfélögin British Airways (BA) og American Airlines (AA) hafa samið sín á milli um að félögin renni að einhverju leyti saman sem meðal annars gerir þeim kleift að samhæfa ýmsa þætti fyrirtækjanna, til dæmis miðaverð og ferðir til áfangastaða. Samningur félaganna tveggja nær einnig til spænska flugfélagsins Iberia sem brátt sameinast BA.

Flugfélögin hafa þurft að leita leiða til þess að draga úr kostnaði sem hefur hækkað mikið undanfarið. Eldsneytiskostnaður hefur náð methæðum auk þess sem tekjur flugfélaga í heiminum almennt hafa dregist saman.

Enn á þó formlega eftir að staðfesta samkomulagið, því ekki eingöngu verður að huga að samkeppnislögum heldur þarf einnig að yfirfara hvort samningurinn standist bandarísk lög um erlent eignarhald yfir flugfélögum.

„Góðar fréttir fyrir neytendur en ekki Richard Branson"

Nokkrir hafa lýst yfir áhyggjum sínum með samruna þessara tveggja flugfélaga en enginn er þó áhyggjufyllri en Richard Branson, eigandi Virgin Atlantic flugfélagsins. Segir Branson samrunann ógna allri samkeppni sem muni leiða til þess að það verði fyrst og fremst almenningur sem tapi.

„Þetta eru kannski ekki góðar fréttir fyrir Richard Branson en þetta eru góðar fréttir fyrir neytendur," svaraði Willie Walsh, forstjóri BA.

Þrátt fyrir þá staðreynd að BA og AA eigni sér nærri helming allra lendinga og brottfara á Heathrow-flugvelli virðast flestir fagna þessu samkomulagi, meðal annars þingmenn í Bretlandi. Þó er ekki vitað um afstöðu bandarísku forsetaframbjóðendanna tveggja, Obama og McCain, en Branson sendi þeim bréf fyrir stuttu þar hann sagði samruma BA og AA skaða alvarlega alla samkeppni á flugleiðinni yfir Atlantshafið.