Heiðar: Félagið ætlar sér stóra hluti

Heiðar Helguson mun í dag ganga til liðs við enska B-deildarliðið QPR á lánssamningi frá úrvalsdeildarfélaginu Bolton þar sem hann hefur fá tækifæri fengið að undanförnu.

Til greina kemur að QPR kaupi Heiðar í janúar næstkomandi en þangað til fær hann tækifæri til að sýna sig og sanna hjá félaginu.

„Mér líst mjög vel á félagið. Þarna eru tveir leikmenn sem voru með mér hjá Watford og svo þekki ég marga þeirra frá því að ég spilaði gegn þeim á sínum tíma," sagði Heiðar í samtali við Vísi í dag.

Bernie Ecclestone og Flavio Briatore eru meirihlutaeigendur félagsins en þeir eru þekktir úr heimi Formúlu 1-kappaksturins. Sá síðarnefndi er stjórnarformaður QPR.

„Ég hef nú aldrei hitt þessa ágætu menn og get því voðalega lítið sagt um þá. En ég held nú að þeir ætli sér stóra hluti með þetta félag, annars hefðu þeir aldrei keypt það. Þeir ætla sér að fara upp með félagið og ég held að þeim muni takast það. Þeir virðast tilbúnir að eyða miklum peningi í félagið."

Heiðar segir það kærkomið að fá tækifæri til að spila reglulega á nýjan leik en sem fyrr segir hafa tækifærin hjá Bolton verið af skornum skammti auk þess sem hann hefur átt við þrálát meiðsli að stríða á undanförnum misserum.

Heiðar skoraði sigurmark íslenska landsliðsins gegn Möltu í gær. „Það var mjög gott að fá að spila aftur enda ekkert spilað að ráði síðan í Skotaleiknum. Leikurinn í gær var fínn og þetta var verðskuldaður sigur sem hefði getað verið stærri."