Friedel getur jafnað met James

Brad Friedel getur um helgina jafnað met David James sem er sá leikmaður sem hefur leikið flesta úrvalsdeildarleiki í röð eða 166 talsins.

Ef Friedel kemur við sögu í leik Aston Villa og Manchester United um helgina, eins og allar líkur eru á, mun hann jafna met David James sem hann setti þann 20. apríl síðastliðnum.

Friedel er 37 ára Bandaríkjamaður sem á langan feril að baki. Hann lék sína fyrstu leiki í Evrópu með Bröndby árið 1994 og gekk svo til liðs við Galatasaray þar sem hann lék leiktíðina 1995-96.

Hann fór svo til Englands er hann gekk til liðs við Liverpool árið 1997 og var þar í þrjú ár. Flesta leiki lék hann með Blackburn á árunum 2000 til 2008 eða 287 talsins. Hann fór svo til Aston Villa í sumar.

Hann á einnig 82 landsleiki að baki með bandaríska landsliðinu en síðast lék hann með því árið 2005.

Flestir leikir í röð í ensku úrvalsdeildinni:

166 David James (Manchester City og Portsmouth)

- frá 17. janúar 2004 til 20. apríl 2008

165 Brad Friedel (Blackburn og Aston Villa)

- frá 14. ágúst 2004

164 Frank Lampard (Chelsea)

- frá 13. október 2001 til 26. desember 2005

159 David James (Liverpool)

- frá 19. febrúar 1994 til 23. febrúar 1998

140 Shay Given (Newcastle)

- frá 20. janúar 2001 til 31. október 2004