Tekst Boston að vinna á útivelli?

Detroit Pistons og Boston Celtics eigast við þriðja sinni í úrslitum Austurdeildarinnar í NBA í nótt og verður leikurinn sýndur beint á Stöð 2 Sport klukkan hálfeitt eftir miðnætti.

Staðan er jöfn 1-1 í einvíginu eftir að Detroit varð fyrsta liðið til að vinna leik í Boston í úrslitakeppninni í fyrrakvöld. Boston vann fyrsta leikinn nokkuð örugglega en allt annað var að sjá til Detroit-liðsins í öðrum leiknum.

Ef Boston tapar leiknum í nótt jafnar það met Miami Heat frá árinu 2004 og LA Lakers frá árinu 1971, en þessi lið töpuðu fyrstu sjö útileikjum sínum í úrslitakeppninni þau ár.

Hefði Boston hinsvegar unnið síðasta leik, hefði liðið jafnað met með 10. heimasigrinum í röð í úrslitakeppni.