Meiðsli Torres alvarlegri en fyrst var talið

Fernando Torres verður lengur frá vegna meiðsla sinna en í fyrstu var talið. Hann verður frá í allt að fjórar vikur en ekki tvær.

Torres meiddist í leik með Liverpool gegn Marseille í Meistaradeild Evrópu í síðustu viku. „Við sögðum að hann yrði frá í tvær eða þrjár vikur en nú viljum við ekki setja neinn ákveðinn tímaramma fyrir hann," sagði Rafael Benitez, stjóri Liverpool.

„Hann mun snúa aftur þegar hann er tilbúinn, ekki fyrr. Við ætlum að gefa honum góðan tíma til að jafna sig."

Torres hefur ítrekað átt við þessi meiðsli að stríða en hann er tognaður á vöðva aftan á lærinu. Þetta er í fimmta skipti á undanförnum átján mánuðum sem hann er frá vegna meiðslanna.

„Við viljum laga þetta vandamál í eitt skipti fyrir öll," bætti Benitez við.