Chelsea og Evra kallaðir fyrir dóm

Enska knattspyrnusambandið hefur kallað Chelsea og Patrice Evra, leikmann Manchester United, fyrir dóm vegna atviks sem átti sér stað eftir leik liðanna á síðasta keppnistímabili.

Evra lenti saman við starfsmann Chelsea á Stamford Bridge en sá síðarnefndi var sakaður um að hafa móðgað Evra.

Evra er kærður fyrir ósæmilega hegðun og Chelsea fyrir að brjóta reglur enska knattspyrnusambandsins í tengslum við hegðun starfsmannsins.

Kærur gagnvart starfsmanninum sjálfum, Sam Bethell, voru látnar falla niður þar sam sannað þótti að Chelsea hafi ekki sagt honum að reglur enska knattspyrnusambandsins ættu einnig við hann.

Chelsea hefur því verið kært fyrir að láta ekki í ljós í ráðningarsamningi hans hvaða skyldur væru til hans gerðar í þessu sambandi.