Barton frá í tvo mánuði

Joey Barton, leikmaður Newcastle, verður frá næstu tvo mánuðina eftir að í ljós kom að hann er með sködduð liðbönd í hné. Hann meiddist í leik Newcastle gegn Wigan um helgina.

Barton sneri upp á hnéð er hann lenti í tæklingu með Lee Cattermole, leikmanni Wigan en leiknum lauk með 2-2 jafntefli.

Þetta staðfesti félagið nú í morgun en Barton sagðist þó ekki kenna Cattermole um hvernig fór.

„Við áttum báðir jafnan möguleika á því að ná til boltans og fórum í hann. Svona lagað gerist," sagði Barton. „Þetta er auðvitað afar svekkjandi en ég ætla mér að ná mér eins fljótt og mögulegt er."

Barton hóf að spila með Newcastle á nýjan leik í lok síðasta mánaðar eftir að hafa tekið út sex leikja bann.