Jafnt hjá WBA og Portsmouth

West Brom og Portsmouth skildu í dag jöfn, 1-1, í fyrri leik dagsins í ensku úrvalsdeildinni. Peter Crouch og Jonathan Greening skoruðu mörk leiksins.

West Brom er því enn í botnsæti deildarinnar en er nú með tólf stig, einu stigi á eftir Blackburn. Portsmouth er í sjöunda sæti deildarinnar með 23 stig.

Hermann Hreiðarsson var á varamannabekk Portsmouth í dag en alls voru þrjár breytingar gerðar á byrjunarliði liðsins sem tapaði fyrir Wolfsburg í UEFA-bikarkeppninni í vikunni. Noe Pamarot, Papa Bouba Diop og Peter Crouch voru allir í byrjunarliði Portsmouth.

Tony Mowbray, stjóri West Brom, gerði hins vegar enga breytingu á sínu byrjunarliði en liðið tapaði fyrir Wigan um síðustu helgi.

Leikurinn var nokkuð fjörlegur til að byrja með og voru heimamenn hættulegri í sínum sóknarleik. Chris Brunt átti ágætt skot að marki sem fór naumlega framhjá áður en Jonathan Greening kom þeim yfir undir lok fyrri hálfleiksins.

Sol Campbell braut á Ishmael Miller og skaut Brunt boltanum í slána úr aukaspyrnunni. Greening náði frákastinu og kom boltanum í netið.

Portsmouth byrjaði síðari hálfleikinn af krafti og var Crouch nálægt því að jafna metin strax í upphafi eftir undirbúning Defoe.

Crouch brást hins vegar ekki bogalistin skömmu síðar er hann jafnaði metin fyrir Portsmouth. Hann átti skot að marki sem fór af varnarmanni West Brom og í netið.

Bæði lið fengu ágæt færi eftir þetta en Scott Carson, markvörður West Brom, var næstum búinn að fá klaufalegt mark á sig er hann vær nærri búinn að missa af sendingu Glen Johnson en hann náði að bjarga á marklínu.