Ívar: Of snemmt að afskrifa hin liðin

Ívar Ingimarsson segir að það sé of snemmt að fullyrða að aðeins þrjú lið eru í baráttunni um efstu sætin í ensku B-deildinni í knattspyrnu.

Þetta sagði hann í samtali við Bracknall Times en Ívar leikur með Reading sem er í þriðja sæti deildarinnar. Wolves er á toppnum með sex stiga forystu á Birmingham sem er með 34 stig, einu meira en Reading.

Burnley, lið Jóhannesar Karls Guðjónssonar, er svo í fjórða sæti með 29 stig.

„Birmingham og Wolves unnu sína leiki um helgina. Þetta eru góð lið sem munu halda áfram að safna stigum. Við verðum að gera slíkt hið sama."

„En þetta er ekki barátta þessara þriggja liða. Tímabilið er svo langt," bætti Ívar við en rúmur þriðjungur tímabilsins er liðinn. „Fyrir nokkrum árum var Crystal Palace í þriðja neðsta sæti deildarinnar í janúar og fóru síðan upp í úrvalsdeildina um vorið."

„Tímabilið í þessari deild er svo langt að það er engu líkara en að þetta séu tvö tímabil í einu. Hlutirnir eru fljótir að breytast ef lið vinna eða tapa nokkrum leikjum í röð."

„Það lið sem sýnir hvað mestan stöðugleika á tímabilinu mun standa uppi sem sigurvegari og það er það sem við þurfum að gera."