Ronaldo áhugasamur um Manchester City

Brasilíumaðurinn Ronaldo segist vita vel af áhuga Manchester City á sér og að hann sé nú að einbeita sér að endurhæfingu sinni til að skoða þann möguleika betur.

Ronaldo meiddist illa á hné á síðustu leiktíð og hefur verið að vinna í því að koma sér aftur í form hjá brasilíska félaginu Flamengo.

„Ég er um það bil 70 prósent klár sem þýðir að ég er nokkuð nálægt því að geta spilað á nýjan leik. Ég veit af áhuga Manchester City og ætla mér að skoða þann möguleika betur," sagði Ronaldo.

Einnig er haft eftir föður Ronaldo í breskum fjölmiðlum að hann vilji snúa aftur til Evrópu. Ronaldo hefur einnig verið orðaður við PSG.