Tíu ár frá fyrsta leik Gerrard

Á morgun verða liðin tíu ár frá því að Steven Gerrard lék sinn fyrsta leik með aðalliði Liverpool. Hann segist vilja fagna áfanganum með því að verða enskur meistari með félaginu.

Gerrard var átján ára gamall þegar hann kom inn á sem varamaður þegar að Liverpool vann sigur á Blackburn.

„Það er í forgangi hjá mér að sigra í ensku úrvalsdeildinni. Við teljum að við séum nægilega góðir til að gera alvöru tilkall til þess," sagði Gerrard í samtali við enska fjölmiðla.

„Við þráum það allir mjög mikið. Ég vil verða meistari því mér hefur aldrei tekist það áður. Ég vil ekki ljúka ferlinum mínum án þess að hafa orðið enskur meistari."

Liverpool varð síðast enskur meistari árið 1990 en Gerrard hefur orðið Evrópumeistari í bæði Meistaradeild Evrópu og UEFA-bikarkeppninni með Liverpool, sem og bikar- og deildarbikarmeistari.

Liverpool og Chelsea eru sem stendur efst og jöfn að stigum.

„Við erum ekki vanir þeirri áskorun sem fylgir því að vera í titilbaráttunni allt tímabilið. Það er annað að vera að berjast um efstu fjögur sætin, þar sem maður hefur efni á því að tapa án þess að það hafi of mikil áhrif."

„Hins vegar getur það verið ansi dýrkeypt fyrir lið í titilbaráttunni ef þau til dæmis tapa tveimur leikjum í röð."

„En við erum í titilbaráttunni eins og er og ætlum að gera allt sem í okkar valdi stendur að þannig verði það út tímabilið."