Vidic bjargvættur United

Nemanja Vidic var hetja Manchester United er hann tryggði sínum mönnum sigur á Sunderland með marki á lokamínútum leiksins.

Óhætt er að segja að United hafi verið með yfirburði í leiknum en liðið sótti nánast stanslaust allan leikinn og var allt útlit fyrir að leiknum myndi ljúka með markalausu jafntefli.

Alex Ferguson stillti upp sama liði og vann Manchester City í deildinni um síðustu helgi. Það var hins vegar enginn Roy Keane hjá Sunderland enda hætti hann í vikunni. Fjórar breytingar voru gerðar á byrjunarliði liðsins sem tapaði fyrir Bolton um síðustu helgi. Dwight Yorke, El-Hadji Diouf og Anton Ferdinand voru í liðinu á ný og þá var Martin Fulop í markinu í stað Craig Gordon sem er meiddur.

Carlos Tevez var ekki í byrjunarliði Manchester United en hann skoraði þrennu í 5-3 sigri United á Blackburn í enska deildabikarnum í vikunni.

United var miklu meira með boltann í leiknum en færin voru þó ekki eins mörg í fyrri hálfleik og þeim síðari. Carlos Tevez kom meira að segja inn á sem varamaður snemma í síðari hálfleik en allt virtist koma fyrir ekki.

Ronaldo fékk nokkur ágæt færi áður en honum var skipt af velli vegna meiðsla en Dimitar Berbatov fékk frábært færi þegar skammt var til leiksloka. Michael Carrick gaf fyrirgjöfina á Berbatov sem var vel staðsettur stutt frá markinu en skallaði yfir.

Stuttu síðar fékk Nemanja Vidic annað gott skallafæri en beint á Fulop í markinu.

En þá kom loksins að því. Michael Carrick átti skot að marki sem fór í stöngina og þar var Nemanja Vidic mættur til að hirða frákastið og skora sigurmark leiksins.