United ætlar ekki að kaupa í janúar

Alex Ferguson, stjóri Manchester United, segir litlar líkur á því að félagið muni fá nýja leikmenn til félagsins þegar að félagaskiptaglugginn opnar í janúar.

United hefur verið sterklega orðað við Serbann Zoran Tosic og greindu fjölmiðlar frá því í síðustu viku að félagið hafi tekist að fá vinnuleyfi fyrir hann.

En Ferguson sagði að leikmannahópurinn myndi ekki breytast. „Við munum ekki fá nýja leikmenn en ég er viss um að City mun stunda einhver viðskipti," sagði Ferguson og átti þar við grannanna í Manchester City.

Félagið var í haust keypt af fjárfestingafélaginu Abu Dhabi United Group og telur Ferguson að félagið muni láta til sín taka á leikmannamarkaðnum.

„Það er tilgangslaust að tala um hvað félagið á mikið af peningum ef það á ekki að nota þá. Það segir sitt að þeir reyndu að kaupa 4-5 leikmenn klukkutíma áður en félagaskiptaglugginn lokaði í haust."