Megson og Anelka bestir í nóvember

Gary Megson, stjóri Bolton, var í dag kjörinn knattspyrnustjóri nóvembermánaðar og Nicolas Anelka hjá Chelsea besti leikmaðurinn.

Megson stýrði Bolton til sigurs í fjórum leikjum af fimm er Bolton vann sér sæti í efri hluta deildarinnar. Bolton vann fyrst Manchester City og Hull, tapaði svo fyrir Liverpool en vann svo Sunderland og Middlesbrough.

Margir stuðningsmanna Bolton voru orðnir óþreyjufullir í garð Megson í lok október er Bolton var í einu af fallsætum deildarinnar. Liðið er hins vegar nú í tíunda sæti og mætir Aston Villa um helgina.

Anelka hefur látið mikið af sér kveða en hann skoraði sjö mörk í síðasta mánuði. Hann nýtti tækifæri sitt vel á meðan að Didier Drogba, félagi hans í sókn Chelsea, var fjarverandi vegna meiðsla.

Anelka skoraði til að mynda þrennu í 5-0 sigri Chelsea á Sunderland. Hann skoraði bæði mörk Chelsea í 2-0 sigri á Blackburn og skoraði svo aftur tvö mörk í 3-0 sigri á West Brom.