Benitez segist ekki efast um hæfileika sinna manna

Haft var eftir Rafael Benitez í viðtali við franskan fjölmiðil í dag að hann teldi sína menn ekki nógu góða til að vinna ensku deildina.

Enn fremur er því haldið fram í viðtalinu að eina leiðin til að Liverpool verði meistari er ef hin þrjú stórliðin - Manchester United, Chelsea og Arsenal - klúðri sínum málum.

Þessu harðneitaði Benitez á blaðamannafundi í dag og sagði ekki rétt eftir sér haft.

„Við erum allir hæstánægðir með að vera í efsta sæti deildarinnar og ég get fullyrt að ef við verðum enn á toppinum eftir jól munum við eiga möguleika á að vinna titilinn," sagði Benitez.

„Ég var að tala við franskan blaðamann og við vorum að tala um leikskipulag. Það kom mér virkilega mikið á óvart að lesa þetta í viðtalinu. En við erum á toppi deildarinnar þar sem við höfum verið að standa okkur betur en aðrir. Þetta er bara undir okkur komið."