Maradona heldur með United í kvöld

Argentínska goðsögnin Diego Maradona ætlar að halda með Manchester United í úrslitaleik Meistaradeildarinnar í kvöld. Það er aðallega vegna vináttubanda hans við Carlos Tevez, leikmann United.

Maradona er nú staddur á kvikmyndahátíðinni í Cannes, þar sem frumsýnd var heimildamynd um hann eftir serbneska snillinginn Emir Kusturica.

Myndin er sögð varpa ljósi á skrautlegt líf knattspyrnukappans fyrrverandi utan vallar og meðal annars er kíkt í Kirkju Maradona, sem er uppátæki eldheitra stuðningsmanna kappans.

Í myndinni segir Maradona meðal annars að hann muni aldrei taka í höndina á Karli Bretaprinsi og þar kallar hann George Bush, forseta Bandaríkjanna, "mennskan ruslahaug."