Rússneski seðlabankinn í umfangsmikilli björgunaraðgerð

Rússneski seðlabankinn pumpaði rúmlega 4.000 milljörðum króna inn á fjármálamarkaði landsins í morgun til að reyna að bjarga honum frá hruni. Ítrekað hefur þurft að stöðva viðskipti í kauphöllum landsins vegna þess að vísitölur þeirra hafa hrunið í gær og í morgun.

Markaðarnir hafa tekið þessari innspýtingu vel og eru að rétta úr kútnum þessa stundina.

Það eru einkum þrír stórir bankar sem njóta góðs af aðgerð seðlabankans en þetta eru Sberbank, VTB og Gazprombank.

Fjármálamarkaðurinn í Rússlandi hrundi nær til grunna í gær eftir að MICEX vísitalan féll um 17,5%. Þá voru viðskiptin stöðvuð. Í morgun hefur vísitalan hinsvegar hækkað um 4,5% í kjölfar aðgerðar seðlabankans.