Moa sagður á leið til Manchester United

Manchester United er sagt vera á höttunum eftir norska framherjanum Moa Abdellaoue sem leikur með Vålerenga í norsku úrvalsdeildinni.

Hann er sagður vera hinn nýi Ole Gunnar Solskjær sem gerði garðinn frægan með United á sínum tíma. Moa er 23 ára gamall og skoraði tvö mörk í 4-1 sigri Vålerenga á Stabæk í úrslitum norsku bikarkeppninnar.

Útsendarar margra enskra liða voru á bikarúrslitaleiknum en United er sagt hafa boðið honum til æfinga.

Forráðamenn Vålerenga vildu ekkert tjá sig um málið þegar að norskir fjölmiðlar leituðu eftir því.

Hann lék sinn fyrsta leik með norska landsliðinu á árinu og er í landsliðshópnum sem mætir Úkraínu á miðvikudaginn.