Evrulán í Eystrasaltsríkjunum kunna að leiða til sænsks bankahruns

Göran Collert segir í viðtali við e24 að útlitið í Eystrasaltsríkjunum nú minni óþægilega á ástandið í Svíþjóð í upphafi fjármálakreppu tíunda áratugarins og óttast stórtap sænsku bankanna. Collert segir ekki útilokað að sænsku bankarnir þurfi að afskrifa 12 prósent útlána sinna í Eystrasaltsríkjunum. Hagfræðingar sem e24 tala við segja að í versta falli kunni bankarnir að þurfa að afskrifa 15 prósent útlána sinna. Ef svo fer myndu afskriftirnar nema á fimmta tug milljarða sænskra króna.

Greiningardeild Swedbank segir þó að ólíklegt sé að hrein útlánatöp bankans nemi meira en 0,5-1,2 prósent útlána í Eystrasaltsríkjunum. Samkvæmt nýrri greiningu Citigroup er því þó spáð að afskriftirnar muni nema 2 prósentum. Fyrr í sumar spáði Merrill Lynch því að útlánatöp í Eystrasaltsríkjunum yrðu allt að 3,5 prósent. Citigroup bendir á til samanburðar að í bankakrísu tíunda áratugarins hafi útlánatöp hjá Handelsbank orðið hæst 2,8 prósent hjá Handelsbanken.

Sænskir bankar eru mjög stórir á bankamarkaði í Eystrasaltsríkjunum. Útlán Swedbank í Eystrasaltsríkjunum nema 190 milljörðum sænskra króna og útlán SEB nema 143 milljörðum sænskra króna, eðasamtals nærri 4.400 milljörðum íslenskra króna. Markaðshlutdeild þeirra í Eystrasaltsríkjunum er um 30 prósent. Hinir stóru sænsku bankarnir, Handelsbanken og Nordea, hafa lánað mun minna til Eystrasaltsríkjanna.

Collert segir ástæðurnar þær að hátt hlutfall lána heimilanna í Eystrasaltsríkjunum eru í evrum, meðan tekjur þeirra eru í þeirra eigin mynt. Gjaldmiðlar Eystrasaltsríkjanna hafa verið bundnir evrunni, en mikil verðbólga að undanförnu ógnar þessari bindingu, og líkur eru því á gengisfellingum í Eystrasaltsríkjunum. Við gengisfall munu heimilin því ekki geta borgað af lánum, sem bankarnir munu neyðast til að afskrifa.

Þá hafa fasteignamarkaðir í Eystrasaltsríkjunum hækkað mikið að undanförnu, en nú hefur loftið tekið að leka úr þeirri blöðru. Fyrir vikið hefur verð veða bankanna fallið í verði.