Zola vill Green í landsliðið

Gianfranco Zola, knattspyrnustjóri West Ham, segir að Robert Green markvörður liðsins sé vel hæfur til að spila með enska landsliðinu.

Green átti stórleik með West Ham þegar liðið gerði markalaust jafntefli gegn Liverpool á útivelli í fyrrakvöld.

Green er 28 ára gamall og á einn landsleik að baki. Hann hefur hins vegar ekki verið valinn í landsliðið síðan að Fabio Capello tók við því.

„Ég er búinn að segja honum að ef hann heldur uppteknum hætti verður hann valinn aftur í landsliðið," sagði Zola í samtali við enska fjölmiðla.

„Capello veit vel hvað hann þarf að gera og Green veit að hann verður að halda sínu striki áfram. Ég er mjög ánægður með Robert. Honum virðist líða vel eftir að hafa fengið nokkra gagnrýni á sig. En hann er að uppskera laun erfiðsins núna enda hefur hann lagt mjög hart að sér."