Gull slær 28 ára gamalt verðmet

Verð á gulli er nú komið í 756 dollara únsan eða sem svarar 46.000 kr. og hefur ekki verið hærra í 28 ár. Það voru mikil kaup japanskra fjárfesta á markaðinum í Tokýó sem ollu þessum miklu verðhækkunum í dag.

Áhugi Japana á kaupum á gulli kemur á sama tíma og jenið heldur áfram að veikjast. Og veiking jensins er vegna ótt um verðhjöðnun og að hagvöxtur verði neikvæður í landinu í náinni framtíð.

John Reade sérfræðingur í eðalmálmum segir að Japanir hafi áður kynnt undir hátt verð á gulli. "Kaup Japana koma oft eins og þruma úr heiðskíru lofti," segir Reade. "En það er of snemmt að segja til um hvort þeir séu að yfirtaka markaðinn með gull."