M&S fylgist grannt með Sainsbury

Stuart Rose, forstjóri Marks & Spencer, segir að fyrirtækið íhugi að leggja fram tilboð í Sainsbury, þriðju stærstu stórmarkaðakeðju Bretlands. „Eignir sem þessar koma ekki oft inn á markaðinn,“ sagði hann á miðvikudaginn og bætti við að eigendur M&S myndu álíta hann vera fífl ef hann skoðaði ekki málið.

Hlutabréf í Sainsbury hækkuðu um tæp átján prósent í febrúar eftir að þrír fjárfestingasjóðir undir forystu CVC Capital Partners sögðust vera að íhuga að taka Sainsbury yfir. Það myndu verða stærstu skuldsettu fyrirtækjakaup í evrópskri sögu.

Styrkur M&S liggur í fatnaðinum en Sainsbury hefur sterka stöðu í matvörunni. Éf félögin færu í eina sæng mætti ná fram hagstæðari samningum við birgja og spara tugir milljónir punda í stjórnunarkostnað. Samanlögð velta félaganna yrði 25 milljarðar punda á ári samanborið við 30 milljarða punda hjá Tesco, stærstu stórmarkaðakeðju Bretlands.

Stjórnendur M&S ætla ekki að svo stöddu að leggja fram formlegt tilboð en áskilja sér rétt til þess ef stjórn Sainsbury óskar eftir slíku eða CVC Capital Partners setur fram formlegt yfirtökutilboð.