Matís leitar leiða til að koldíoxímerkja matvæli

Matís, (Matvælarannsóknir Íslands) leita nú leiða til þess að koma til móts við kröfur Tesco, stærstu verslunarkeðju Breta, um koldíoxíðmerkingar matvæla.

Tesco hyggst koldíoxíðmerkja allar vörur sem seldar eru í verslunum keðjunnar. Tilgangurinn er sá að gera neytendum kleift að afla sér upplýsinga um hversu mikil koldíoxíðlosun hafi fylgt framleiðslu vörunnar, flutningi hennar í verslunina og sölu. Þessi aðgerð er liður í áætlun Tesco sem miðar að því að bregðast við loftslagsbreytingum.

Sveinn Margeirsson, deildarstjóri hjá Matís, segir umræðu um koldíoxíðmerkingu matvæla vera hluta af umræðu um sjálfbæra þróun. Matís stýrir fundi í næstu viku um þau sóknarfæri sem felast í sjálfbærri þróun fyrir íslenskan sjávarútveg. Á fundinum verða þátttakendur í verkefninu "Sustainable Food Information"

"Seljendur og neytendur gera kröfu um að hægt sé að sýna fram á að framleiðsla sjávarafurða sé með þeim hætti að ekki sé gengið á fiskistofna eða að mikil losun koldíoxíðs (CO2) fylgi framleiðslunni. Áætlun Tesco er einfaldlega eitt dæmi af mörgum sem sýnir hver þróunin er í þessum málum. Það er mín skoðun að sjálfbær þróun verði eitt af lykilmálunum fyrir íslenskan matvælaiðnað í framtíðinni," segir Sveinn. Hann segir að íslensk sjávarútvegsfyrirtæki standa vel að vígi þegar kemur að því að sýna fram á hver losun koldíoxíðs er í tengslum við framleiðslu afurðanna.