Fasteignasalar gegn samdrætti

Danir eru hugsandi yfir horfum á fasteignamarkaði þessa dagana en sjaldan hafa jafn margar íbúðir verið til sölu. Spáð hefur verið verðlækkunum, sem þegar eru orðnar að veruleika, ekki síst á Stór-Kaupmannahafnarsvæðinu.

Margir fasteignasalar hafa tekið upp bandarískar aðferðir til að að selja fasteignir víðs vegar um landið.

Danska viðskiptablaðið Börsen bendir á að sala á íbúðamarkaði hafi dregist saman á svæðinu og sé af sem áður var þar eð margir haldi að sér höndum.

Í ljósi þessa hafi fasteignafélög á borð við Corell Ejendomme hætt við að auglýsa 42 nýjar leiguíbúðir með kaupréttarákvæði. Margir veigri sér við því að festa sér fasteign af ótta við að markaðsverðmæti eigna þeirra eigi eftir að falla.

Blaðið segir marga fasteignasala í Danmörku hafa gripið til ýmissa ráða til að hleypa lífi í fasteignamarkaðinn. Þannig bjóði sumir flatskjái eða bifreiðar í kaupbæti með íbúðum eða húsum auk þess sem ýmiss annars konar góðgæti fylgir með kaupum á fasteignum svo sem líkamsræktarkort og utanlandsferðir.

Bent er á að þessi aðferð sé vel þekkt í Bandaríkjunum en það var fyrst í ár sem löglegt varð að freista neytenda með þessum hætti í Danmörku.