Sainsbury óskar eftir lengri tíma

Stjórn bresku matvörukeðjunnar Sainsbury er sögð fylgjandi því að biðla til bresku yfirtökunefndarinnar um að framlengdur verði lokafrestur fjárfestahópsins CVC til að leggja fram yfirtökutilboð í keðjuna.

Breska dagblaðið Times hefur eftir Philip Hampton, stjórnarformanni Sainsbury, sem er þriðja stærsta matvörukeðja Bretlands, að hann sé tilbúinn til að fara fram á lengri frest á meðan CVC íhugar tilboð. Fjölmiðlum í Bretlandi þykir þetta auka enn líkurnar á að Sainsbury falli CVC í skaut leggi hópurinn fram tilboð.

Nokkrir hafa verið orðaðir við Sainsbury, þar á meðal Baugur sem nýtti sér hækkun á gengi bréfa í keðjunni og seldi með góðum hagnaði. Þessu til viðbótar lýsti fyrir skömmu hópur bandaríska fjárfesta yfir áhuga sínum og orðrómur er um áhuga þriðja fjárfestahópsins.

Breska yfirtökunefndin gaf fjárfestum frest til 13. apríl til að leggja fram formlegt tilboð. Rætt hefur verið um að tilboð í Sainsbury komi til með að hljóða upp á 11 milljarða punda, jafnvirði 1.436 milljarða íslenskra króna, hið minnsta.