House of Fraser skattleggur birgja sína

 

 

House of Fraser, sem er í eigu Baugs Group, hefur lagt fram kröfu um að birgjar verslunarkeðjunnar hjálpi til við að fjármagna 250 milljón punda, eða tæplega 30 milljarða kr., fjárfestingarverkefni. Þetta kemur fram í frétt breska dagblaðsins Telegraph í dag.

 

Verslunarkeðjan ætlar að leggja sérstakann skatt eða gjald, allt að 4%, á birgjana til að hjálpa til við endurbætur og endurbyggingu á verslunum sínum. Ætlunin er að höfða til efnameiri kúnna en nú er. Þetta er í annað sinn á innan við ári sem House of Fraser hefur reynt að endursemja um kaup og kjör við birgja sína.

 

Að sögn Telegraph er birgjunum viðbrugðið og einn þeirra segir áform verslunarkeðjunnar "árásargjörn" og "fáránleg". Talið er að margir birgjanna muni berjast gegn þessum áformum þar sem markaður þeirra er viðkvæmur þessa stundina.

 

Telegraph vitnar í bréf frá Stefan Cassar, fjármálastjóra House of Fraser, til birgjanna í síðustu viku. Þar segir m.a. að til að allir njóti góðs af verulegum hagnaðartækifærum sé nauðsynlegt sé frekari samvinna nauðsynleg. Allir verði að taka þátt til að sýna fram á samvinnu og stuðning í framtíðinni. „Því er ég að tilkynna þér formlega að frá og með 30. desember 2007 munu eftirfarandi breytingar verða gerðar á viðskiptasamningum."

 

Breytingar sem boðaðar eru í bréfinu felast m.a. í því að birgjar borgi á bilinu 2 til 4% af veltu sinni í fyrrgreindan skatt eftir um hvaða verslanir sé að ræða og að þetta gjald minnki um 0,5 til 1% ef birgjar nái 5-10% í aukinni sölu í verslununum.

 

Að sögn Telegraph vildi talsmaður Baugs ekki tjá sig um málið.