Enn eitt tapið hjá Derby

Derby tapaði í dag fyrir Blackburn í fyrri leik dagsins í ensku úrvalsdeildinni. Derby komst yfir en tapaði á endanum 2-1.

Í stöðunni 1-0 fékk Derby reyndar vítaspyrnu og hefði getað komist í 2-0 en Brad Friedel varði spyrnu Steve Howard. Í kjölfarið skoraði Blackburn tvö mörk á næstu fimm mínútum og dugði það til á endanum.

Stephen Bywater á enn við meiðsli að stríða og því stóð hinn ungi Lewis Price enn í marki Derby. Þeir eru reyndar nokkuð margir í liði Derby sem eru meiddir um þessar mundir.

Hjá Blackburn komu þeir Tugay og Aaron Mokoena í stað David Dunn og Steven Reid í byrjunarliðið sem og þeir Benni McCarthy og Stephen Warnock.

Hvorugt liðið hefur átt góðu gengi að fagna undanfarið en Blackburn hafði ekki unnið síðustu fjóra leiki sína í deildinni. Roque Santa Cruz hefur reyndar skorað sjö mörk í þessum fjórum leikjum en það hefur skilað fáum stigum.

Það var einmitt Santa Cruz sem var fyrstur til að koma knettinum í netið eftir fyrirgjöf David Bentley frá vinstri. Markið var hins vegar dæmt af þar sem boltinn fór út fyrir endalínuna og aftur inn á völlinn í fyrirgjöf Bentley.

En Blackburn var þó óumdeilanlega með undirtökin í leiknum og því kom það nokkuð gegn gangi leiksins þegar að Matt Oakley kom Derby yfir.

Hann fékk fína sendingu frá Giles Barnes og náði góðu skoti að marki sem hafnaði í netinu.

Derby fékk svo gullið tækifæri til að komast í 2-0 þegar að Ryan Nelsen er dæmdur brotlegur eftir viðskipti sín við Kenny Miller.

Steven Howard tók spyrnuna en hún var nokkuð slök og Brad Friedel varði vítaspyrnuna.

Ekki leið nema rúm mínúta þar til Blackburn jafnaði metin og í þetta sinn skoraði Roque Santa Cruz fyllilega löglegt mark.

Benni McCarthy átti skot að marki sem Price varði en hann hélt ekki boltanum sem datt beint fyrir fætur Santa Cruz sem skoraði af stuttu færi.

Þremur mínútum síðar kom svo rothöggið er David Bentley skoraði annað mark Blackburn með laglegu skoti utan vítateigs.

Leikurinn var fjörlegur í síðari hálfleik þó engin mörk hafi verið skoruð. Bæði lið fengu sín færi til að skora en allt kom fyrir ekki.