Martin O'Neill afar ósáttur við dómgæsluna

Martin O'Neill knattspyrnustjóri Aston Villa sagði að mjög hefði hallað á sína menn í leiknum gegn Chelsea í dag sem lyktaði með 4-4 jafntefli.

O'Neill sagði að vítaspyrnan sem Chelsea fékk undir lok fyrri hálfleiks hafi verið afar vafasamur dómur. Aston Villa var þá með 2-0 forystu en missti mann af velli með rautt spjald vegna dómsins og Chelsea minnkaði fyrir vikið muninn á mikilvægum tímapunkti í leiknum.

„Þetta var eitt af aðalatriðum leiksins. Skyndilega er staðan orðin 2-1 og við orðnir manni færri. Við fengum ekki einn vafadóm dæmdan okkur í hag," sagði O'Neill.

„Þrátt fyrir að við fáum næstu fimmtán dóma okkur í hag mun það aðeins bæta upp fyrir þetta að hluta til."